Расці разам з дзецьмі
01.05.2021
У жыцці кожнага надыходзіць час выбару свайго шляху, прызначэння. І шчаслівы той, хто не шкадуе аб зробленым выбары. Так лічыць намеснік загадчыка ясляў-сада №19 па асноўнай дзейнасці Вікторыя Пятроўна Гяч.
– Аб тым, што мая прафесія будзе звязана з дзецьмі, я ведала яшчэ ў раннім узросце, – расказвае Вікторыя Пятроўна. – Для мяне не было цікавей занятку, чым гульня з малодшай сястрой у дзіцячы сад і школу: прадстаўляючы сябе настаўнікам, я вучыла яе маляваць і пісаць. Чытала казкі і розныя гісторыі цацкам, паказвала ім спектаклі ўласнага сачынення.
Вікторыя з адзнакай скончыла Віцебскі дзяржаўны ўніверсітэт імя П.М. Машэрава па спецыяльнасці «Педагогіка, псіхалогія дашкольная. Лагапедыя».
– З боку можа здацца, што працуючы з дзецьмі, я толькі гуляю, гутару, адказваю на пытанні, назіраю, – адзначае Вікторыя Пятроўна. – Быць выхавальнікам дашкольнай установы – гэта значыць праводзіць вялікую работу з дзецьмі. Самае галоўнае ў нашай прафесіі – выхаванне маленькага чалавека як асобы. На мой погляд, прынцыпова не важна, якой методыкі прытрымліваецца выхавальнік. Важна выкарыстоўваць тое, што найбольш эфектыўна працуе і прыносіць свой плён, што падыходзіць для маіх выхаванцаў, што для іх цікава, выклікае жаданне спрабаваць, тварыць.
Вікторыя Пятроўна двойчы станавілася пераможцай раённага і абласнога конкурсаў прафесійнага майстэрства «Настаўнік года Рэспублікі Беларусь» у намінацыі «Выхавальнік дашкольнай адукацыі» (2013 і 2020 гады).
У 2020 годзе Вікторыя Пятроўна стала пераможцай рэспубліканскага конкурсу «Настаўнік года Рэспублікі Беларусь». Пераможца абласнога конкурсу прафесійнага майстэрства «Майстар Мінскай вобласці-2020». У мінулым годзе прымала ўдзел у Міжнародным фестывалі педагагічнага майстэрства ў горадзе Душанбэ.
Як член рэспубліканскага клуба «Крыштальны журавель» рэгулярна праводзіць майстар-класы і выступае са стэндавымі дакладамі па актуальных праблемах дашкольнай адукацыі на канферэнцыях.
– Кожнае дзіця ўнікальнае. У ім жыве і таленавіты мастак, і дапытлівы назіральнік, і нястомны эксперыментатар, – адзначае Вікторыя Пятроўна. – Ён адкрыты для прыгажосці, пошуку. Вучыцца разам з дзецьмі, расці з імі – вось мой дэвіз па жыцці.
У вольны час Вікторыя Пятроўна захапляецца літаратурай, любіць падарожнічаць, займаецца валанцёрствам.
Ірына МАЛЯЎКА.
К списку записей раздела