Па наступным адрасе вогнішча таксама было размешчана ўдалечыні ад пабудоў, каля яго – вядро з вадой, рыдлёўка. Сумненняў няма: гаспадары ўсё кантралююць.
Падобная прадбачлівасць, безумоўна, радуе. Але яшчэ трэба ўлічваць надвор’е, распальваць вогнішча варта толькі калі няма ветру.
Травяныя палы, гаворыць інспектар, жыхары сельскай мясцовасці, тлумачаць здаўна заведзеным звычаем рабіць так.
– Выпальванне старой травы на самой справе не спрыяе росту маладой, а наносіць прыродзе сур’ёзную шкоду, – адзначае Дзмітрый Шчарбачэня. – Агонь знішчае не толькі сухастой, але і насякомых, жывёл, парушае каранёвую сістэму раслін, знішчае ўрадлівы пласт зямлі. Травяны пал – гэта той жа пажар. Любая неасцярожнасць у абыходжанні з агнём можа прывесці да сур’ёзных наступстваў, таму важна быць заўсёды пільнымі, асцярожнымі, уважлівымі.
Наступнае вогнішча выяўляем на дрэваперапрацоўчай вытворчасці ў вёсцы Замосце.
Як і ў папярэдніх выпадках, усе правілы супрацьпажарнай бяспекі быццам бы выкананы, але парушана самае галоўнае: развядзенне агню на тэрыторыі прадпрыемстваў строга забаронена.
– Ды вось сабралі смецце, спецыяльна абсталявалі месца, – здзіўляўся ўладальнік прадпрыемства. – А калі мы для гэтага жалезную ёмістасць возьмем, вогнетушыцель паставім?
Адказ катэгарычны: забаронена.
– Можна з дазволу кіраўніка сельгасарганізацыі абсталяваць месца для спальвання смецця за дзесяць метраў ад плота, за мяжой вытворчасці, – растлумачыў інспектар. – Сёння я вас толькі папярэджваю, але ў наступны раз будзе выпісаны штраф.
Наведаўшы яшчэ некалькі вёсак, мы пераканаліся, што падобныя рэйды і тлумачальныя гутаркі праводзяцца недарэмна: грубых парушэнняў у развядзенні вогнішчаў выяўлена не было.
Слуцкі раённы аддзел па надзвычайных сітуацыях нагадвае: за выпальванне сухой расліннасці, траў на корані або за непрыняцце мер па ліквідацыі выпальванняў прадугледжаны штраф ад 10 да 40 базавых велічынь. Штраф да 12 базавых велічынь можна атрымаць за распальванне вогнішча ў забароненым месцы.
Усім грамадзянам падчас рэйду раздавалі буклеты супрацьпажарнай тэматыкі.
Ірына МАЛЯЎКА.